Sevinc Fədai - jurnalist, köşə yazarı: "3 yaşlı oğluma Birliyin təqdimat mərasiminə onu da aparacağımı deyəndə mənim yanımda oturmaq istədiyini bildirdi. Fikirləşdim ki, niyə də yox?! Axı biz cəmiyyətimizə aşılamaq istədəyimiz dəyərlərə, fikirlərə ilk olaraq özümüz əməl eləməli, sayğı duymalıyıq. Eləcə də həmişə vurğuladığımız kimi, uşaqlara körpəlikdən şəxsiyyət kimi yanaşılmalı, şəxsiyyət kimi yetişdirilməli, fikirləri dinlənilməli,nəzərə alınmalıdır. Belə olarsa, onların özünəinamı güclü olar, özlərinə dəyər verər, natamamlıq kompleksi yaşamazlar. Övladlarımız bizim həyatımızı çətinləşdirmir, gözəlləşdirir. Həmçinin, bizim ana olmağımız o demək deyil ki, vəzifəmiz ancaq uşağa baxmaqdır. Biz ana olaraq təkcə öz övladımızı yetişdirməyə yox, cəmiyyətə də fayda verməyə qadirik. Elə onlarla birlikdə! Birlik olaraq yaranma səbəbimiz elə həm də bu mesajı topluma ötürmək və aşılamaqdır. Əziz analar, sizi də bu mənada yanımızda görmək istəyirik. Əziz atalar, sizdən isə cəmiyyətə, bir uşağa belə faydası toxuna biləcək həyat yoldaşınıza dəstək göstərməyi, onun yollarını bağlamağı yox, açmağı rica edirik. Çünki o sizin övladınızın böyüdüyü, yetişdiyi mühit, toplum üçün çalışacaq. Bununla bilavasitə yenə də öz övladınızın daha yaxşı və daha sağlam cəmiyyətdə formalaşmasına çalışmış olacaqsınız. "

Gülnaz Mehdiyeva - pedaqoq, uşaqlar üçün yazılmış "404 məntiq" kitabının müəllifi: "Birliyimizin bir məqsədi də təhsil imkanlarından kənarda qalan uşaqlara dəstək olmaq onların cəmiyyətə inteqrasiyasına yardım etməkdir. Bu yolda ailələrin rolu böyükdür. Uşaqların təhsil almasında, onların cəmiyyət həyatında önəmli yer tutacağına ilk öncə onlar inanmalıdır. Bunun üçün də biz bir çiçək, bir kitab, bilgi və sevgi ilə ailələrə daxil olmaq, onları maarifləndirməklə, psixoloji dəstək verməklə istəyimizə nail olmağa çalışacağıq. Bu yolda bizə dəstəyiniz çox vacibdir. Gələcəyimiz üçün birlikdə xilaskar ola bilərik Əziz insanlar, dünyani kitab, dəftər-qələm xilas edəcək, alanda birini də artıq alın."

Nərmin Veysəlova - kiçik sahibkar, uşaqlar üçün bir çox xeyriyyə aksiyalarının təşkilatçısı: "Sağlam cəmiyyətin formalaşması üçün mütləq sağlam düşünən, sağlam ruhlu qadına ehtiyac var. Müxtəlif tibb müəssisələrində olanda ən çox diqqətimi çəkən aqressiv, əsəbi analar və onlar tərəfindən şiddətə məruz qalan körpələr olur. Bir sözlə, bioloji analığını analıq ruhu ilə tamamlaya bilməyən qadınlar görür və təəssüf hissi keçirirəm. Unutmayaq ki, bu günün uşaqları, gələcəyin valideyni, cəmiyyətin bir fərdidir. Və əminəm ki, bu barədə deyilən hər bir sözün, aparılan maarifləndirmə işlərinin böyük təsiri, faydası olur. Həyatımda aldığım ən gözəl təşəkkürlərdən biri, övladına tərbiyə etdiyini sanıb şiddət göstərən qadınla söhbətdən müəyyən vaxt sonra ondan aldığım təşəkkür olub. Bunu və digər məsələləri nəzərə alaraq Qadın və Uşaqlarən Təhsilinə Dəstək İB olaraq üzərimizə düşən məsuliyyətin fərqindəyik. Bu yolda cəmiyyətin maddi və mənəvi rifahı üçün hər zaman diqqətini əsirgəməyən ölkənin birinci xanımı Mehriban Əliyeva və Heydər Əliyev Fondunun vitse-prezidenti Leyla Əliyevanın gördüyü işləri təqdir edir və onların dəstəyi ilə qadın və uşaqlarımızın yollarını işıqlandıracağımıza inanırıq."

Nigar Sultanlı – kulturoloq, sənətşünaslıq üzrə fəlsəfə doktoru, elmi və publisistik məqalələr müəllifi: "Öncə cəmiyyətimizin qadınlara münasibətində bir neçə məqamın diqqətdə saxlanılmasının arzusundayam. İlk olaraq qadınlığın necə bir məfhum olduğunu, onun bəşəri missiyalarını, dəyər anlayışının, özgüvənin aşılanması qadınlar üçün vacib olanlardan biridir. Xoşbəxtlik anlayışını ümumi nəzəriyyə kimi qəbul edib, lakin onu dadmayan qadınların sayı çoxdur. Daxilən xoşbəxt olmayan, ətrafını məmnun və xoşbəxt etməyə çalışan qadının haqqı ödənilirmi? Qadın anadır! Dünyaya övlad gətirsə də, gətirməsə də, bu missiya ona tapşırılıb. Və ən əsası, uşaq tərbiyəsi onun mənəvi vəzifəsidir. Ənənəvi və yenilənən tərbiyə üsulları haqında da danışmağa dəyər. Bu və ya digər məsələlərlə bağlı biz qadınlar Qadın və Uşaq Akademiyası İctimai Birliyinin ətrafında cəmləndik. Məqsədimiz maarifləndirmək, bilik və bacarığımıza ehtiyacı olanlara dəstək olmaqdır. Və “bacardım” hissinin onlara yaşatmaqdır..."

İlahə Fazilova - "Təhsildə İnnovativ Texnologiyalar" Əlavə Təhsil Mərkəzində dövlət layihələri üzrə mütəxəssis: "Niyə məhz qadın? İnsanın mövcudiyyəti mütləq həqiqətin dərk edilməsi üçün dünyada öyrənmə mühitinə cəlb olunmasından başqa bir şey deyil. Yəni dünya insan üçün ən böyük və təbii öyrənmə mühitidir. Bu mühitdə öyrənmə prosesinin yerinə yetirilməsi əvvəlcə ətraf aləm haqqında informasiyanın insanın altşüurunda özünə yer etməsi məqsədilə ana bətni və ana südü ilə başlayır. Sonra məktəb yaşına qədər uşağın öyrənməsi üçün əsas resurs olan ana ilə dialoqlar, ortaq oyunlar və s. ilə davam edir. Azərbaycan reallığında 80 faiz müəllimin qadın olduğunu nəzərə alsaq öyrənmə prosesində orta və ali təhsil mühitində də qadınların əsas mənbə olduğunu müşahidə edirik. Məncə, bu qədər səbəb “Niyə məhz qadın” sualının cavabını əhatə etmiş olur. Qadınlar müxtəlifdir, fəsillərə bənzədiləni, ən gözəl güllərlə müqayisə olunanı, dünyada ən çirkin sözləri eşidəni, arzuları ürəyində boğulanı, cinsinin həyatda yaşamaq üçün ən böyük buxov olanı da var. Biz öz həyatlarımızın memarı olan qadınlar yığışaraq bu birliyi məhz mənəvi dəstəyə, arzularını həyata keçirmək üçün kiçik bir təkana ehtiyacı olan qadınlar üçün yaratdıq. Jan Pol Sartr deyir ki, insanın özünə qarşı etdiyi ən qorxulu sui-qəsd hər şeyin yaxşı olacağına olan ümidinin itirməsidir. Ümidsizlik insan üçün mənəvi intihardır. Qadınların mənəvi intiharının qarşısını almaq üçün biz onları “BİR GÜN MÜTLƏQ HƏR ŞEYİN YAXŞI OLACAĞINA” inandırmaqdan başlayıb daha uzun yol qət edəcəyimizə inanırıq."

.

Günay İlqarqızı - jurnalist: "Bu gün qadın olmaq ya güclü görünmək, ya da güclü olmaqdır. Seçim bizimdir. Əgər həqiqətən, güclü olsaq, təhsil də ala bilər, təhsil də verə bilərik. Qadın olmaq həm də ana olmaqdır. Övladınla böyümək, böyütmək, insan yetişdirmək deməkdir. Unutmayın, körpə beşiyi yelləyən dünyanı yelləyər. Məqsədimiz övladlarımızı sevgi və inamla yetişdirmək, bu dövrdə qadın duyğularımızı, öz inkişafımızı kölgədə qoymamaqdır. Birliyimiz bunun üçün həmin qadınların yanında olmaq, onlarda özünəinam yaratmaq, özünü inkişaf etdirmək üçün psixoloji dəstək proqramları hazırlayır, müxtəlif seminarlar təşkil edir. Hər bilgili qadın savadlı cəmiyyət deməkdir. Cəmiyyətə daha faydalı olmaq ümidi ilə…"

Gülşən Qəhrəmanlı - Musiqişünas, müəllimə: "Bu cəmiyyətin gerçək güzgüsü qadındır, anadır. Qadının, ananın ruh halı necədirsə, cəmiyyətimiz də o durumda olur. Əgər nədənsə narazıyıqsa, nələri düzəltməyi düşünürüksə, ilk növbədə, qadına olan münasibəti düzəltməliyik. Toplumun qadına olan münasibəti həm də anaya olan münasibətdir. Cəmiyyətdən müsbət impulslar alan qadının edə bilməyəcəyi nə isə çətin ki ola, onun qazana bilməyəcəyi uğur yoxdur. Ətrafından müsbət enerji alan bir qadının böyütdüyü uşaq da gələcəkdə toplumun bütün həssas məsələlərinə duyarlılıq göstərəcək və beləliklə, biz bu məsələdə diqqətli olmağımızla cəmiyyətin təməlinə sağlam daşlar qoymuş olacağıq. Belə bir cəmiyyət qurmaq üçün bu gün bizim, bəlkə də, çox enerjimiz gedəcək, çox zaman itirəcəyik və nələrdənsə keçmiş olacağıq, ancaq gözəl gələcəyə doğru böyük bir ümid yaradacağıq. Bu yolda uğurumuz bol olsun! İnanıram ki, hər şey gözəl olacaq!"

Rübabə Mərdanova- psixoloq, NLP master, təlimçi, uşaq psixologiyası mövzusunda yazılmış “Hər uşağın öz dünyası” adlı kitabın müəllifi: “Daha çox uşaq və yeniyetmələrlə iş aparıram. Onlarla ünsiyyətdən, duyğularını çəkinmədən ifadə etmələrindən zövq alıram. Təəssüfləndiyimsə, onların bu duyğuları və fikirləri əksər hallarda valideynləriylə bölüşə bilməməsi, onlarla aralarında sərhədlərin olmasıdır. Bir uşağın həyata, dünyaya güvənə bilməsi üçün ilk növbədə öz valideynlərinə güvənməsi, insanlara verdiyi sözü tuta bilməsi üçün valideynlərinin onunla münasibətdə tutarlı olması, insanlarla məsafəni gözləyə bilməsi üçün valideynlərinin onun şəxsi zonasına hörmət etməsi vacibdir. Bunların olması üçün isə uşaqlardan əvvəl valideynlərin maarifləndirilməsi vacibdir. Yeniyetmələrlə valideynləri arasındakı uçurumun əsası uşaqlıqda qoyulur. Vaxtında tədbir görülməyəndə onları ya mənəvi, ya da cismani olaraq itirmiş oluruq. Məqsədim hər zaman valideynlərə hər uşağın ayrı bir dünya olduğunu, fərdi və fərqli yanaşmanın vacib olduğunu aşılamaq, bu yolda “uşaqların dili” ola bilməkdir”.

Cahan Seyidzadə – filoloq, yazar: "Orta əsrlərdə, daha da dəqiqləşdirsək, XII əsrdən XVIII əsrə qədər davam edən, XV əsrdə isə kulminasiya nöqtəsinə çatan "cadugər ovu" qadınlara qarşı yönəlmiş bir hərəkat idi. Bu hərəkat nəticəsində minlərlə qadın dul və kişilər olmadan yaşaya bildikləri üçün cadugərlikdə günahlandırılaraq öldürülürdülər. Əsrlərdir qadınlığa müxtəlif izahlar, təriflər verilib, çoxsaylı ünvanlar yaraşdırılıb. Lakin bir qadını, onun hisslərini, gücünü və zəif nöqtələrini o qadının özündən və həmcinslərindən başqa heç kim daha yaxşı anlaya bilməz. Vircinia Vulf "Özünə aid bir otaq" əsərində yazır ki, hər bir qadının müstəqil gəliri və özünə aid bir otağı olmalıdır. Qadın zaman-zaman o otağa çəkilib düşünməli, bəzən isə yazıb-yaratmalıdır. Şərqdə hər bir qadının özünə aid bir otağı olmasa da, özünə aid bir zirzəmisi mütləq var... Yaşaya bilmədiklərini, susduqlarını, danışa bilmədiklərini "yığdığı" qaranlıq, keçmiş qoxuyan, nəmli, tozlu, vahiməli və düşməyə çəkindiyi zirzəmi. O zirzəmilərin qaranlıq, dar dəhlizlərində gəzinmək, keçmişlə üzləşmək qadınların canına həmişə qorxu salır. Qorxu isə insan ömrünü alt-üst edən, yağmalayan duyğudur. Bir insan xilas olmaq istəyirsə, əvvəlcə qorxularından qurtulmalıdır. Sonra digərlərinə yardım etməlidir. Çünki əlləri bağlı olan biri başqasını xilas edə bilməz. Bu gün cəmiyyətimizdə qorxuları ilə mübarizə aparan, keçmişin əsarətindən qaçmağa çalışan qadınlarımız olduqca çoxdur. Həmin qadınlara getdikləri yolda dəstək olmaq, onları daha aydınlıq günlərə ötürmək üçün əlimizdən gələni etməliyik. Gözəl günlər bizə gəlməz, biz onlara getməliyik. Sevgi və inamla!"

Lalə Əliyeva - pedaqoq, xaricdə təhsil üzrə mütəxəssis, SAT/İELTS/TOEFL/GMAT/GRE proqramları üzrə aparıcı mütəxəssis: "Bir pedaqoq kimi uşaqlar və yeniyetmələrlə daim ünsiyyətdə olduğum üçün onların həyat tərzləri və düşüncələri ilə yaxından tanış olmaq şansım olur. Həmçinin, valideynlərin onların fikirlərinə, arzularına və gələcək planlarına dair yanaşmalarının da şahidi oluram. Yeniyetmənin sağlam düşüncəli və cəmiyyətə faydalı bir insan olaraq yetişdirilməsində valideyn böyük rol oynayır. Əminliklə deyə bilərik ki, öz şəxsi inkişafına zaman ayıran ana övladına olan mənəvi borcunu, yəni tərbiyə metodlarını daha inkişafyönlü, sevgi və qayğı ilə, şiddətdən qaçınaraq tədbiq edir. Qadın və Uşaqların Təhsilinə Dəstək İctimai Birliyinin əsas məqsədi isə həm qadınlarımızın sosial həyatda iştiraklarını təmin etmək, həm də ailədə övladlarını daha sağlam bir fərd kimi yetişdirilməsində rol oynamaq, fərqli seminarlar və layihələr vasitəsilə onlara psixoloji və mənəvi yardım göstərməkdir. Xoşbəxt qadın - xoşbəxt cəmiyyət, xoşbəxt uşaqlar deməkdir. Hüseyn Cavidin dediyi kimi: "Qadın gülərsə, şu ıssız mühitimiz güləcək, Sürüklənən bəşəriyyət qadınla yüksələcək”.

Pərvanə Şıxaliyeva - Beyləqan rayonu Seymur Abbasov adına Çəmənli kənd tam orta məktəbin Tarix müəllimi: "Bir müəllim kimi ən böyük məqsədim şagirdlərimə stimul vermək, onların cəmiyyətə faydalı insan kimi yetişməsinə dəstək göstərməkdir. Bu dəstəyi daha çox məktəbliyə göstərə, daha faydalı ola bilmək üçün burdayam".